Matthew 9

Iesu Ga Lox Aroo Laradi Labantuxu Ren Ga Molo Axap

(Mk 2:1-12; Lu 5:17-26)

1La ne Iesu mi luvuttadi loklok ka anasa ren diga los kas at lesepang la diga sen kaxat la diga rupot to at lemenemen at ne Iesu. 2Lentaba luvuttadi digap kip lara laradi mi loora, labantuxu ren ga molo axap la diga vosiga ne Iesu. Se ne Iesu ga ven kibis lunuunu atdi, ni ga lok ti mo laradi mekmeres keretna, “Nuruk, una lolos. Leveloklok kakapmek axap taram, a doxoma xepe i.”

3Lentaba luvuttadi loklox ase at Lenavolo diga ronga i na la diga epaase xantubu atdi xeretna, “Na laradi i paase vupu ri ne Moroa.”

4Iesu gaklen levendoxoma atdi la ga lok tidi xeretna, “Tila levendoxoma atnimi i umsu mi laxapmek mumu na lavanga? 5Ua levelinga kopmen na lolos ti tong i; leveloklok kakapmek taram ara doxoma xepe vam i, kopla ana tong i do, katu kaxat la unat pas? 6Ketla a vara minaklen i do nenia, Laradi Mevana, a ruuna lololos at na lavatbung menemen kusu ri doxoma xepe leveloklok kakapmek.” La ne Iesu ga vaase bok ti mo laradi xeretna, “A tong i ru, una xatu upana la una xip kaka loora ram la una vas kaxat uto xolonu.” 7La mo laradi ga xatu kaxat la gat pas uto xolonu. 8Se mo limixin axap diga ven i na, diga lingun, la diga emi asu mi ne Moroa, mo ga raba lololos kerepmo ti limixin.

Iesu Ga Ro Ka Ne Levi

(Mk 2:13-17; Lu 5:27-32)

9Iesu ga vas kaxat basinge mo lenep la neni ga ven lara laradi, laasen teren ne Metiu, mo gat kis at loogu xekepe pilas. La ne Iesu ga lok tin, “Una mumu asu ia.” La ne Metiu ga xatu upana la ga mumu asu i.

10La ne Iesu gat kis at laanan to xeneng at loogu at ne Metiu la buaang atnedi luvuttadi loklok ka pilas, la lentaba limixin kapmek bok diga rupot la diga anan eburu mi ne Iesu mi luvuttadi loklok ka anasa ren. 11Se lubung Parisi diga ven i na, diga sue luvuttadi loklok ka anasa ren keretna, “Tila leeme loklox ase atnimi i anan eburu mi limixin loklok ka pilas mi limixin kapmek?”

12Iesu ga ronga i nom la ga lok tidi xeretna, “Limixin di lox avukat, kopmen dinak pakes ti loklok tooro, ketla nedi xusuk mun dik meres. 13La minat pas la minaklen ka lavasuun at na levelinga keneng at Lovoang Kaala i lok keretna,

‘Nia axopara levelaplavang, a vara i xusu mina lox asuusu lebelemumu.’ ^a

Nia aga rupot kusu ri ro xaka limixin bilinga kusu dina leeng, la kopmen nia a goxo rupot kusu rinedi limixin mokmokso.”

Iesu Ga Paase Mumu Loklok At Lumun An

(Mk 2:8-22; Lu 5:33-39)

14Luvuttadi loklok ka anasa at ne Jon, laradi sep susu, diga vosiga ne Iesu la diga sue i, “Nema mi lubung Parisi ma mun anan amisik, ketla luvuttadi loklok ka anasa ram kopmen dina mun an. Ua lavasuun teren?”

15Iesu ga vorang i ridi mi lavapaase poovo xeretna, “At loklox anarong at leepot, lentaba at laradi epot di noxo bulu mila laradi epot move ik lox eburu midi. Ketla laaleng mo naba rupot la limixin petpes diba lam ka laradi epot basinge lentaba ren, la dina mun anan ba ap mo levenaleng.”

Lempapaase Poovo Mumu Levenanasa Maxat At Ne Iesu

16La ne Iesu ga vaase bok tidi mi lavapaase poovo xeretna, “Kopmen teta na balais ka loxontamon maxat kusu na sok gatgat pe lamamara at labantamon maut min; mo do neni na lox i xuren, labantamon maxat ira lok kapmek pam la kopmen na epovo bok ba kusu na lok tavanga min; la nom loxontamon maxat noxo epovo xusu na lok pe avukat lamamara at loxontamon maut.”

17La ne Iesu ga vaase bok tidi mi lavapaase poovo. Ni ga lok keretna, “Kopmen tara na soli li laxadan vaen maxat uto xeneng ti labantuxu at lavatme i maut pam. Mo do neni na lox i xuren, mo labantuxu ba remdas la laxadan vaen naba soli su axap, la labantuxu maut naba lok kapmek. Laxadan vaen maxat mina soli li i at labantuxu maxat, la kopmen tempanga ba lok kapmek.”

Iesu Ga Lox Aroo Loolik At Laradi Gomgo

(Mk 5:21-43; Lu 8:40-56)

18Ap mo mun loxonaleng ne Iesu ga tong i na, lara laradi ga vot, neni lara atnedi luvuttadi amgomgo at loogu singising ap mo lemenemen. Ni ga xis tiktikbu mi luvatgulom teren saparap luxangkedek at ne Iesu la ga lok tin, “Ana vam, loolik tarak i met. Ketla una ven be i la una long tu ren la ni naba roo.” 19La ne Iesu ga xatu kaxat la ga emu min, la luvuttadi loklok ka anasa bok teren.

20La lara latkin mo ga nemen; lanmeres gaaling gak lok teren at levenaleng amisik, ni ga ruuna nom lanmeres at lasangaun mi legepu maares; ni ga vas mu ne Iesu ro melemu la ga long tu at lungusungus at lavanga singsiga ren. 21Ni ga doma i do neni na long tu at lavanga singsiga ren, neni ba lox avukat.

22La ne Iesu ga rem gili la ga ven kora ka i. La ga lok tin, “Latkin. Una lolos. Lunuunu ram ira lox avukat pam u.” La ap mo mun loxonaleng mo latkin ga lox avukat ta.

23Se ne Iesu ga vubeles at loogu ap mo laradi gomgo, ni ga ven buaang limixin, lentaba diga mas lengkaatu atdi, la lentaba digang teng la diga saxaanu mumu mo loolik. 24Ni ga lok tidi, “Uto nimi. Loolik kopmen na met, neni i unga mun.” Ketla diga lok sese i. 25La diga vas su ukamang, la ne Iesu ga vubeles la ga ranga aru lekngen loolik la ga lox axatu kaxar i. 26La levelinga mumu i na ga epeseves at lengkot axap ap mo lenep silok.

Iesu Ga Lox Aroo Luradi Levengkatli Atdu Ga Main

27La ne Iesu ga vas kaxat la at lavatpas teren, legepu radi levengkatli atdu ga main, duga mumu i la duga toro keretna, “Livisik li at ne Devit. Una balamu nama’.”

28La ne Iesu ga vubeles at lara loogu la mo luradi ga vot pasa i, la ni ga lok tidu xeretna, “Kereva, mu nuunu do nenia a epovo na lox avukat levengkatli atnumu?”

Duga vorang i rin keretna, “Laaba, Leeme Silok.”

29La ne Iesu ga long tu at levengkatli atdu la ga lok tidu, “Nemu mu nuunu rak la kerepmo levengkatli atnumu na lox avukat.” 30La levengkatli atdu ga lox avukat ta. La ne Iesu ga paase lolos tidu xeretna, “Nemen muta tong i na ri teta.” 31Ketla duga vas kaxat basinge mo loogu la duga tong i ri limixin at lengkot axap ap mo lenep silok.

Iesu Ga Riki Asu Lagas Kapmek Basinge Laradi

32Melemu atnedu duga on basinge ne Iesu, limixin diga lam ka lara laradi uto saparap ne Iesu. Lagas kapmek ga nemen ap mo laradi la goxo epovo na paase. 33Se ne Iesu ga riki asu mo lagas, mo laradi ga epovo ba xusu na paase. Mo limixin diga sangu la diga lok, “Kopmen tempanga kerepmo maga ven i nade Israel.”

34Ketla lubung Parisi diga lok keretna, “Neni i riki asu lubunggas mi lololos at laradi gomgo at lubunggas.”

Limixin Gugu At Ne Moroa Kopmen Dina Buaang

35Iesu gat pas kantubu at levenmenemen silok axap, eburu mi lengkonmenemen kakalik, ga anasa limixin to at laraugu singising atdi la ga vavang mi Lagale Lavavang mumu Linintoo at ne Moroa. La ne Iesu ga lox avukat limixin basinge levenasen anmeres axap. 36Kuren la ne Iesu ga ven nedi buaang limixin la ga balamu di mila diga baava mi levenaknixip la digak pakes aleng, kerekngan levesipsip kopmen taradi loklok tatao atdi. 37La ne Iesu ga lok ti luvuttadi loklok ka anasa ren, “Laraamang mo ira mukun pam, ketla ixo buaang nedi luvuttadi kusu ri lox abeles leveluxa ukeneng at laraugu. 38Kuren la mina sing ti laradi loklok tatao at laraamang kusu neni naba riki asu tuvuttadi kusu ri lox abeles leveluxa.”